थारू आयोगमा दुई जना पदाधिकारीबीच लफडा भएको छ। कार्यवाहक अध्यक्ष सुबोध सिंह थारू र सदस्य शान्ति मोदीबीच लफडा सुरू भएको हो। हाजिरीको विषयमा उनीहरूबीच द्वन्द्व सुरू भएको हो।

कावा अध्यक्ष सुबोधले जानकारी बिना महिनौं बेपत्ता भएपछि सदस्य मोदीसँग सोधपुछ गरेका थिए। तर, बिदाको समयमा पनि सदस्‍य मोदीले हाजिरी गर्न खोजेको कावा अध्यक्षको आरोप छ।

‘हप्ता दिनको बिदा बसेर उहाँ महिनौं कार्यालयमा आउनु हुन्न। कहाँ कस्तो अवस्थामा हुनुहुन्छ भनेर खोज्ने जिम्मेवारी त आयोगको हो नि। हामीले पनि उहाँसँग निरन्तर सम्पर्क गर्न खोज्यौं। तर, उहाँ सम्पर्कमै आउनुभएन। अहिले बिदाको समयको पनि हाजिरी गर्न खोज्नुहुन्छ। त्यो त ऐन नियम र नियमावलीमा के छ हेर्नुपर्छ नि,’ थारुवानसँग कावा अध्यक्ष थारूले भने।

यसैबीच आइतबार सदस्य मोदीले कावा अध्यक्ष थारूलाई कार्यकक्षमै थुन्ने प्रयास गरेकी छन्। कार्यालयको कक्षमा रहेका बेला सदस्य मोदीले बाहिरबाट तालाबन्दी गरेपछि प्रहरीले नै हस्तक्षेप गर्न पुगेको थियो। प्रहरी आएर तालाबन्दी खोलिएको थारू आयोग प्रशासनले जानकारी दिएको छ।

सदस्य मोदीको उक्त हर्कत लज्जाको विषय रहेको कावा अध्यक्ष थारूले बताए। ‘उहाँले मनपरी गर्नुहुन्छ। जवाफ माग्दा उल्टै तालाबन्दीका नाममा गैरकानुनी काम गर्नुहुन्छ। उहाँले नियम, कानुनसम्मत चल्नुपर्छ भन्ने हाम्रो भनाइ हो,’ उनले भने।