नेपाली कांग्रेसका सभापति गगनकुमार थापाले सामाजिक सञ्जालमा कोलाहल मच्चाउनेहरुले घृणाको भाषा बोल्ने गरेको बताएका छन्। काठमाडौं-१० मा आयोजित चुनावी सभालाई सम्बोधन गर्दै सभापति थापाले त्यसलाई आफूले अस्वाभाविक नमानेको प्रस्ट पारे।

‘बाहिर ठूलो कोलाहल छ। सामाजिक सञ्जालको हल्लालाई मैले अस्वाभाविक मान्दिनँ। संसारभरि सामाजिक सञ्जाल कसको पक्षमा हुन्छ?, जसले घृणाको भाषा बोल्छ। यहाँ उभिएर एक लाइन गाली गरे भने बेलुका म भाइरल हुन्छु,’ उनले भने।

उनले घृणाको भाषा बोलेर देश नचल्ने बताए। ‘देश बिकाउने कुराले मात्र चल्दैन। देश यस्तै नबिक्ने कुराले चल्छ। धेरै बिकाउने कुराले कहीँ पुग्दैन,’ उनले भने। सभापति थापाले त्यसका लागि कांग्रेस नेता-कार्यकर्ताहरू जनताका घर घर पुगेर युवाहरूलाई बुझाउनुपर्ने बताए।