निर्वाचन आयोगले रास्वपाबाट थारू कोटातर्फ समानुपातिक बन्दसूचीमा परेकी उर्मिला चौधरीसहित सात जना थारू उम्मेदवारको नाम हटाएको छ। विभिन्न कारण देखाएर आयोगले उनीहरूको नाम बन्दसूचीबाट हटाएको हो।

आयोगका अनुसार रास्वपाको आग्रहमा उर्मिलाको नाम हटाइएको हो। यसअघि नै उर्मिलाले आफ्नो नाम राखेकोमा आपत्ति जनाउँदै आएकी थिइन्। उर्मिलाको आग्रहमा रास्वपाले उनको नाम फिर्ता लिएको बताइएको छ।

त्यस्तै उमेर नपुगेका प्रजातान्त्रिक पार्टी सप्तरीकी पूजा कुमारी चौधरीको नाम पनि आयोगले हटाएको छ। राष्ट्रिय एकता दलकी प्राणो देवी थरुनी, दीपक चौधरी, राष्ट्रिय जनमोर्चाका विकाराम चौधरी, आम जनता पार्टीकी बसुन्धरा देवी चौधरी र राष्ट्रिय परिवर्तन पार्टीकी सावित्री देवी चौधरीको नाम भने कालोसूचीमा रहेकाले हटाइएको आयोगले जनाएको छ।