अष्ट्रेलियामा बसोबास गर्ने थारूहरूले माघी महोत्सव आयोजना गर्ने भएको छ। थारू समाज सिड्नी अष्ट्रेलियाले जनवरी १५ (माघ १) गते माघी महोत्सव गर्ने भएको हो।

यसअघि पाँचपटक माघी आयोजना गरिसकेको थारू समाज सिड्नी अष्ट्रेलियाले यसपटक पनि माघी महोत्सव आयोजना गर्न लागिएको संस्थाका पब्लिक अफिसर अरुण आर्यन चौधरीले जानकारी दिए। उनका अनुसार जनवरी १५ मा साँझ ५ बजेदेखि राति १० बजेसम्म इन्द्रेणी फंक्सन सेन्टर रकडेलमा हुँदैछ।

कार्यक्रममा यसपटक थारू समुदायको परम्परागत लाठी नाच, झुमरा नाच प्रस्तुत गरिनेछ भने थारू परिकारको व्यवस्था गरिने आयोजकले जनाएको छ। पब्लिक अफिसर चौधरीका अनुसार कार्यक्रममा थारू परिकारहरू ढिकरी, खिचरी, बंगुरको मासु, तिलको लड्डुको स्वाद लिन सकिनेछ।

कार्यक्रममा गायक सविन चौधरीको प्रस्तुतीसँगै थारु रीतिरिवाजअनुसार लाठी नाच, झुमरा नाच, थारु रैम्प, वाक आदि नृत्य, थारू परिकार र खानपिनसहितको सो कार्यक्रममा उपस्थितिको लागि थारु सोसाइटी अफ अष्ट्रेलियाले सम्पूर्ण थारू समुदायलगायत सबै नेपाली दाजु-भाई, दिदी-बैनीहरु लाई हार्दिक अनुरोध गरेको छ।

कार्यक्रमको प्रवेश शुल्क २५ डलर तोकिएको छ। कार्यक्रमसम्बन्धी थप जानकारीका लागि अरुण आर्यण चौधरीलाई 0401435959 वा संस्थाका अध्यक्ष दीप नारायण चौधरीलाई 0411688798 सम्पर्क गर्न अनुरोध गरिएको छ।