थारू कल्याणकारिणी सभा सुनसरी शाखा र थारू महट्वाँ-भल्मन्सा दाङले भारतको पहलगाममा भएको आतंकवादी घटनाको निन्दा गरेका छन्। थाकस सुनसरी शाखाले आतंकारी संगठन लश्कर-ए-तैयवाले निहत्था नागरिकको ज्यान लिएको भन्दै घोर भर्त्सना गरेको हो।

सभाले सुनसरीको झुम्का बजारमा ब्यानर/पम्पलेटसहित विरोध प्रदर्शनसमेत गरे। उनीहरूले धार्मिक अतिवाद र आतंकवादविरुद्ध नारा लगाएका थिए। उनीहरूले घटनामा मारिएका बुटवलका सुदीप न्यौपानेको न्याय दिलाउन मागसमेत गरे।

‘पहलगाममा आतंकवादी हमलाबाट अमानवीय र विभत्स हत्या गरिएकोमा घोर निन्दा गर्न चाहन्छौं। आतंकारीहरूविरुद्धको लडाईँमा सम्पूर्ण समाज एक भएर लड्न आह्वान गर्दछौं। भारतीय जनता र सरकारलाई आतंकारीहरूविरुद्धको लडाईँमा सधैं हाम्रो साथ र समर्थन रहने प्रतिवद्धता जनाउन चाहन्छौं,’ जिल्ला सभापति सगेन चौधरीले भने।

त्यस्तै थारू महट्वाँ-भल्मन्साको अगुवाईमा दाङको तुल्सीपुरमा पहलगाम हमलामा मारिएकाहरूको सम्झनामा दीप प्रज्जवलन गरिएको थियो। सहभागी थारू समुदायका व्यक्तिहरूले आतंकवाद र धार्मिक अतिवादविरुद्ध नाराबाजी गरेका थिए। उनीहरूले मृतक न्यौपानेको न्यायका लागि विश्व समुदायसँग अपील गरेका थिए। यसअघि थारू कल्याकारणकारिणी सभा देउखुरी, थारु जागरण महिला समाजलगायतले पनि घटनाको निन्दा गरेका थिए।