रुपन्देही जिल्लाको मायादेवी गाउँपालिका-५, गुरवनीयाँ स्थायी घर भएका १८ वर्षीय अमरमणि चौधरी मृत अवस्थामा फेला परेका छन्। सरस्वती निकेतन माध्यमिक विद्यालयमा कक्षा १२ (इन्जिनियरिङ संकाय) मा अध्ययनरत चौधरी २०८२ साल पुस ९ गतेदेखि बेपत्ता रहेका थिए। उनी बुबा वैसमुनी थारुका एक्ला छोरा हुन्। हाल उनी काठमाडौंको कुलेश्वर क्षेत्रमा बसोबास गर्दै आएका थिए।

प्रहरीका अनुसार चौधरीले दक्षिणकाली नगरपालिका वडा नं. ७ स्थित भाइरल पुलबाट हाम्फालेको आशंका गरिएको छ। २०८२ पुस २३ गते स्थानीयवासी तथा इलाका प्रहरीको सहयोगमा उनको शव फेला परेको हो।

शवलाई आवश्यक कानुनी प्रक्रिया पूरा गरी पोस्टमार्टमका लागि त्रिवि शिक्षण अस्पताल (टिचिङ अस्पताल), महाराजगञ्ज पठाइएको प्रहरीले जनाएको छ। घटनाबारे थप अनुसन्धान भइरहेको छ।