खिचरा महोत्सवमा यूके ब्वाय उपनामले चिनिने उत्तम चौधरी दर्शकमाझ नयाँ पहिचानसहित उदाएका छन्। मञ्चमा गीत गाउँदै गर्दा हजारौँ दर्शकको भिडबाट “थारू समुदायमा दुर्गेसको उदय भएछ” भन्ने आवाज गुञ्जिएपछि उनलाई ‘थारू दुर्गेस’ उपनाम दिइएको हो।

कपिलवस्तु निवासी उत्तम चौधरीको आत्मविश्वासी प्रस्तुति, स्टेज प्रेजेन्स र र्याप शैलीले दर्शकलाई चर्चित गायक दुर्गेस थापाको झझल्को दिलायो। महोत्सवको माहोल उत्तमका गीतसँगै थप तातिएको थियो। उत्तमले थारू र नेपाली भाषाका आठवटा र्याप गीत प्रस्तुत गर्दै दर्शकलाई उफार्न सफल भए । उनका गीतमा थारू संस्कृति, पहिचान र आत्मगौरव प्रस्ट झल्किन्छ।

‘एनसेलका टावर बा, घोङ्घी ढिक्रीके पावर बा’ भन्दै गीत गाउँदा दर्शकदीर्घाबाट निरन्तर हुटिङ र समर्थन आएको थियो। त्यसैगरी, ‘जोर जोर चिल्लादु मै, मैहुँ एक थारू जात’ भन्ने र्यापमा थारू युवाहरू गर्वले छाती फुलाउँदै हुटिङ गर्दै उफ्रिएका देखिन्थे।

हालः कक्षा ११ मा अध्ययनरत १६ वर्षीय उत्तमले आफ्नो उमेरभन्दा परिपक्व र सशक्त सांगीतिक क्षमता प्रदर्शन गरिरहेका छन्। छोटो समयमै दर्शकको मन जित्न सफल उनी थारू युवामाझ प्रेरणाको केन्द्र बन्दै गएका छन्। यही गति र निरन्तरता कायम रह्यो भने उत्तम चौधरी भविष्यमा गायक दुर्गेस थापाकै समकक्षमा पुग्न सक्ने सम्भावना प्रबल देखिन्छ।