प्रधानमन्त्री केपी शर्मा ओली र भारतीय समकक्षी नरेन्द्र मोदीबीच भेटवार्ता भएको छ। बिमस्टेकको छैटौँ सम्मेलनको समापनसँगै दुई प्रधानमन्त्रीबीच बैंककमा साइडलाइन वार्ता भएको हो। भेटमा नेपाल र भारतबीचको ऐतिहासिक, सांस्कृतिक, धार्मिक र जनस्तरको सम्बन्धमा आधारित पारस्परिक सम्बन्धलाई थप मजबुत बनाउने प्रतिबद्धता जनाइएको थियो।

दुबै नेताबीच व्यापार, सीमापार यातायात, ऊर्जा सहकार्य तथा विकास परियोजनालगायतका द्विपक्षीय सहयोगका विषयमा विस्तृत छलफल भएको परराष्ट्र मन्त्रालयले जानकारी दिएको छ।  भारतीय प्रधानमन्त्री मोदीले नेपालका विकास लक्ष्यप्रति भारतको समर्थन दोहोर्‍याउँदै जलविद्युत, पूर्वाधार र पर्यटन क्षेत्रलाई प्राथमिकता दिँदै सहकार्य अझै विस्तार गर्ने कुरामा जोड दिएका थिए।

भेटमा प्रधानमन्त्री ओलीले भारतको निरन्तर सहयोगप्रति धन्यवाद ज्ञापन गर्दै आपसी सम्मान र हितमा आधारित सम्बन्धलाई मजबुत राख्न आवश्यक रहेको बताएका थिए। उनीहरूबीच नेपाल-भारत सरकारद्वारा सञ्चालित विभिन्न साझेदारका विषयमा पनि समीक्षा गरिएको थियो।

भारतीय प्रधानमन्त्री मोदीले सामाजिक सञ्जालमार्फत ओलीसँगको भेट फलदायी भएको उल्लेख गरेका छन्। उनले भनेका छन्, ‘बैंककमा प्रधानमन्त्री केपी शर्मा ओलीसँगको भेटघाट फलदायी रह्यो। भारतले नेपालसँगको सम्बन्धलाई ठूलो प्राथमिकता दिएको छ। हामीले भारत-नेपाल मित्रताका विभिन्न पक्षहरू विशेष गरी ऊर्जा, कनेक्टिभिटी, संस्कृति र डिजिटल प्रविधि जस्ता क्षेत्रहरूमा छलफल गर्यौं। हामीले यस वर्षको बिमस्टेक शिखर सम्मेलनबाट प्राप्त केही प्रमुख सकारात्मक परिणामहरू विशेष गरी विपद् व्यवस्थापन र समुद्री यातायातका क्षेत्रहरूमा पनि कुरा गर्यौं।’