कृषि,वन तथा पर्यावरणमन्त्री गीता चौधरीले विदेशबाट अरबौंको मल खरिद गर्नुपर्ने अवस्थाको अन्त्य हुनुपर्ने बताएकी छन्। सिंहदरबारमा शुक्रबार बसेको प्रतिनिधिसभा अन्तर्गतको कृषि,सहकारी तथा प्राकृतिक स्रोत समिति बैठकमा मन्त्री चौधरीले विकल्प सिर्जना गरी विदेशबाट अरबौंको मल खरिद गर्नुपर्ने अवस्थाको अन्त्य हुनुपर्ने बताएका हुन्।

नेपालमा नै प्रयाप्त मल उत्पादन गर्न सके मल खरिदका लागि छुट्टाइने अरबौं रकम कृषि क्षेत्रको विकासमा उपयोग गर्न सकिने उनको भनाइ छ । मन्त्री चौधरीले रासायनिक मलको आयातमा मात्रै मन्त्रालयको झण्डै ५० प्रतिशत बजेट खर्च हुने गरेको उल्लेख गरिन्।

उनले कृषि पेशालाई मर्यादित र आकर्षक बनाउन नीतिगत सुधारका लागि मन्त्रालय अघि बढेको जानकारी दिइन् । कृषि क्षेत्रलाई प्रविधिमैत्री बनाउने,किसानको उत्पादनलाई बजारीकरण गर्ने लगायतका विषयमा आफू गम्भीर रहेको उनले बताइन् । उनले कृषकलाई राज्यले उचित सहजीकरण गर्न सके राम्रो उत्पादन र सहज रुपमा बजारसँग जोड्न सकिने धारणा राखिन्।

बैठकमा समिति सदस्यहरूले कृषि उत्पादनको बजारीकरणका क्रममा कृषक मारमा पर्ने गरेको भन्दै बिचौलियाको हस्तक्षेपलाई नियन्त्रण गर्नुपर्नेमा जोड दिएका थिए । साथै उनीहरूले रसायनिक भन्दा प्राङ्गारिक मलको प्रयोगलाई बढावा दिन समेत बताए।